Gedurende Barmhartigheidsmaand in Augustus, poog Badisa en sy verskeie programme om gemeentes bewus te maak van hul impak en hul dienste. Hul bied ook vir gemeentes die geleentheid om betrokke te raak by verskeie Badisa inisiatiewe.
Badisa het ontstaan uit die NG Kerke en VG Kerke en is ‘n medewerker van dié kerke om professionele maatskaplike dienste te lewer. Saam het die organisasies in 2023 ‘n ooreenkoms vir ‘n geïntegreerde diakonale benadering gesluit om gesamentlik te reageer op die geestelike, maatskaplike en ekonomiese versorging en opheffing van mense en gemeenskappe.
Dis hoe Badisa en die kerke onder andere hande vat om gemeenskappe, families en individue met maatskaplike nood by te staan:
- Skep bewusmaking en opvoeding oor onderwerpe soos ouerskap, veroudering, middelafhanklikheid, kinderbeskerming, die kinderwet en so aan.
- Aanbieding van vroeëkinderontwikkelingsprogramme en mediasie dienste.
- Gee leiding en verwysing na ander hulpbronne vir maatskaplike hulp waar Badisa nie dienste lewer nie.
Hoe kerke Badisa kan ondersteun met die volhoubare bedryf van bestaande programme:
- Lewer geestelike insette waar Badisa dienste aanbied.
- Hulp om vrywilligers te werf.
- Stel fasiliteite beskikbaar vir aktiwiteite.
- Hulp met kos en ander bestaansmiddels vir kliënte.
- Maak gemeentelede bewus van Badisa se dienste en fondsinsameling
Besoek gerus www.badisa.org.za om jou naaste program te vind en te ondersteun.
